2010年1月2日 星期六

2010第一糕

工作完就去了玩, 很久也沒烘焙了, 試用friend送的靚刨, 做個最拿手的橙雪, 這個刨真的好好用, 由於刨片超薄, 所以刨出來的橙皮茸一點也不會黏住浪費.



蛋黃3個(60g) 糖20g 暖植物油35g 暖橙汁50g 橙皮茸1個份 低粉70g


蛋白120g 糖40g ------一個很保守的配方.


蛋黃加糖打至微杰, 加暖油徹底打勻, 加橙皮茸和暖橙汁打勻, 加低粉拌至柔滑; 蛋白和糖打至柔滑拉成軟勾, 分兩三次拌入蛋黃麵漿. 170度焗40分鐘.


這個蛋糕, 做了沒十次也八次, 手到拿來吧, 蛋白打到軟性發泡,看, 麵漿多漂亮,  一定成功吧......


錯了!!! 第一個, 焗時爆到像椰菜花, 不詳預兆, 待涼脫模, 收縮得很厲害, 糕底凹到像聚寶盆, 冇可能, 好嬲呀!


再做一個, 情況一樣, 試吓大師傅的方法, 出爐後由1-2呎高處放手碰檯, 結果糕的表面是沒大收縮, 但內心甩皮甩骨, 像被降龍十八掌打到內臟散掉似的. 失敗!


兩個蛋糕, 丟了大半, 也沒心情拍照了.



真的抓破頭, 冇可能連橙雪也衰到貼地(一敗塗地)..........今天有什麼不對頭.........突然想到...........溫度!!! 這天很冷, 室內也只是16度, 雖然用了暖油暖水, 打好的麵漿也很冷, 大慨只是17-18度. 這麼冷的麵漿遇上170度的爐溫, 可能會膨脹得太利害.


好, 暖油暖水也不管用, 唯有座暖水(40度), 打出來的麵漿32-33度, 是膚溫; 蛋白也座暖水, 誰說蛋白要冰冷才穩定? 暖的蛋白霜我也打個好多次, 一樣好穩定.


麵漿拌好了, 一直是保持32-33度, 膚溫微暖.


因為怕死, 下面的蛋糕用了80g低粉, 其實70-75g會更鬆軟, 更雪芳.



奇跡般, 蛋糕升得好溫文, 連糕面也沒裂, 焗好了, 脫模, 近乎完美!!! 苏慢慢, 妳說得對, 要暖!


誰說蛋白要冷......要加檸汁......我親身試過, 要命的.



太太說, 你睡得著吧! :p .......試多幾次先啦, hehe, 不過對表面上很簡單的雪芳蛋糕, 又知多一點了.


當然, 最徹底的終極試驗, 是換爐, 這是2010的大計.


23 則留言:

  1. 請問你睇咗爐未呀 ?? 因我都好想換過大 d 既爐, 了結下我既完美戚風夢 !!
    [版主回覆01/02/2010 21:58:00]係咁意在上海街看過, 法國的Roller Grill, 但係一切都未落實呢, 包括度位, 放置的架子等, 都未考慮, 不過呢個係我所知比較適合我的中型家用爐呢.

    回覆刪除
  2. "出爐後由1-2呎高處放手碰檯" ---- 好似唔使咁刻意架喎!
    [版主回覆01/02/2010 22:06:00]係啦, 其實我都係在網上看資料, 加上有上堂的朋友仔的印象, 我都係試下得唔得.
     
    http://ebake.dyn.dhs.org/Basics/DBQryDesc.asp?Name=%AD%E8%A5X%C4l%AA%BA%B3J%BF|%ADn%A4%A3%ADn%BAL%A4@%A4U%A1H
     
    我越來越覺得關鍵其實係爐的熱量夠不夠在烘焙時迫出蛋糕的水汽呢!

    回覆刪除
  3. 新年快樂﹗
    上次都跟你的食譜整橙雪,我朋友屋企個爐無啦啦架起佐。攪到無乜底火。橙雪升到模邊乍﹗出爐又OK喎﹗真係越簡單越大學問。今次又學到野。
    [版主回覆01/02/2010 22:15:00]嗯, 咁妳的朋友係不凹一族了........我想請問呢, 妳朋友是用那個爐呢? 因為我想計劃今年換爐了.
    係, 簡單而做得好, 係好難的, 每次去澳門, 我都會見到一些老店子的主人, 幾十年只做一味龍鬚糖, 或花生糖, 或金錢餅, 表面好似好單調, 但個中的功夫係好微妙的, 我呢, 一個星期一玩不到一次, 我都係傾向專心d...........間中玩下得意嘢就行了.
    Happy New Year!!

    回覆刪除
  4. 個橙味蛋糕色又好, 糕又鬆軟, 一流。
    [版主回覆01/06/2010 07:38:00]呢個味道是我最喜歡的, 柑橘類的蛋糕是很香的呢!

    回覆刪除
  5. 你真的好用心去研究和嘗試做每一個蛋糕.   真的要向你學習.    Have fun with baking. 
    [版主回覆01/06/2010 07:39:00]最主要係焗左d凹蛋糕, 迫我用心試驗.........其實我都好想一做就得咖.......:)

    回覆刪除
  6. 2010新希望, 我見個爐都ok吧. 很軟綿呀.
    [版主回覆01/06/2010 07:37:00]如果繼續焗到不凹的雪芳蛋糕, 咁我又不用換爐了, 焗麵包(除了法包)或其他東西都ok, 用開有感情呢!

    回覆刪除
  7. HI,想呢你個模係幾多寸架!我都想跟你個MENU試吓~
    [版主回覆01/04/2010 12:27:00]我呢個係17cm模呢!

    回覆刪除
  8. Fatgarfield 肥加菲2010年1月3日 下午3:17

    Mr. Chiffon researcher! Happy 2010!
    [版主回覆01/04/2010 12:27:00]Happy New Year!!!

    回覆刪除
  9. Happy 2010 ~~ 戚風癡!!
    [版主回覆01/04/2010 12:27:00]Happy New Year, I 真係癡了.:)

    回覆刪除
  10. 打蛋白吾係室溫最好咩????
    [版主回覆01/04/2010 12:29:00]有d書說冰凍, 但係我冷打的蛋糕衰晒!!!
     
    暖打反而好好.........不過又要睇吓不同的爐子.

    回覆刪除
  11. 原來粉漿溫度都有影响!! 我上兩星期用 9"無煙囪的模焗朱古力雪芳都爆得好勁, 個底凹咗, 之前夏天時用 8" 無煙囪模焗同一個食譜係好 perfect 的, 唔知係模 size 定係氣溫影响呢?!
    [版主回覆01/04/2010 12:30:00]今次發覺冷暖分別很大, 暖的效果好好呢!

    回覆刪除
  12. 一天連做3個 ?
    [版主回覆01/04/2010 12:31:00]係兩天, 其中兩個凹了.......

    回覆刪除
  13. 雪芳嘅謎團終於解開喇.
    [版主回覆01/04/2010 22:39:00]又爐溫, 又底火, 又打蛋白軟定硬, 又拌的手法........不過今次效果好明顯, 希望真係最後一次試驗啦!

    回覆刪除
  14. 等我有時間都試吓做先得!
    [版主回覆01/05/2010 14:49:00]連秤料連焗, 1小時便可以了.

    回覆刪除
  15. 請問你朋友送既橙皮刨係邊度買ga???
    好似好好用咁!!!
    [版主回覆01/06/2010 07:30:00]在加拿大買的, 我也不知呢.

    回覆刪除
  16. hi... 你好 ... 你真係好有研究喎... 我想問我最近做戚風... 個底都會實左 ... 係乜野原因呢 ???  tq
    [版主回覆01/06/2010 22:35:00]係近模的底? 我估都係麵漿沉了吧.
     
    原因有好多呀, 因看不到實物
    1. 蛋白或蛋黃打得不夠充分
    2. 焗得未夠透(溫度或時間不夠)
    3. 如果一切正常, 最大的原因就是.......麵漿太冷, 座熱水打啦!

    回覆刪除
  17. haha .. tq u ar ... 我會逐樣再試下..... 試完比你睇下再比D意見我丫.....
     
    [版主回覆01/07/2010 07:27:00]好的好的, 試吓啦
     

    回覆刪除
  18.         你果然係易凹一族!我呢個烘焙 BB 班學生,無論用大模定細模,都好少凹喎,我真係都好想知道原因呢!當係跟你學 嘢都 好。         加油,繼續努力!
    [版主回覆01/07/2010 14:10:00]係, 我估不到做得最多, 最耐, 同最拿手的橙雪都凹, 咁應該唔係手勢或材料, 而係個爐同氣溫, 先控制溫度先, 希望已經解決問題啦!

    回覆刪除
  19.         咁你快 啲換 過個爐啦,整失敗 咗時,又浪費食材,自己又唔開心!
    [版主回覆01/08/2010 21:23:00]都有呢個計劃, 不過要先實現另一個先.
     
    失敗呢, 我又不會不開心, 只係又要試試試, 不過也好, 大部份的雪芳知識都係由失敗中得到的. 其實人生都係咁, 每一日都要面對好多錯誤, 平常事.

    回覆刪除
  20.         " 不過要先實現另一個先 "         有新玩具或新攪作?
    [版主回覆01/10/2010 20:01:00]開左估了

    回覆刪除
  21. Amoon兄你的暖蛋漿方法真係好work, 我從未試過啲戚風蛋糕咁幼滑吖. 謝謝你的分享
    [版主回覆01/17/2010 21:24:00]實在太好了, 我都希望大家試吓, 告訴我效果.
    祝大家次次都安安樂樂有蛋糕吃!

    回覆刪除
  22. 真的以為蛋白一定要坐冰水打先好打,原來坐暖水都得咩,要留意啲乜架?
    [版主回覆02/27/2010 21:42:00]我剛衰了......就係冇座住熱水打蛋白.
     
    暖打蛋白, 是適合發得好勁或者易凹的雪芳 ,, 它可令雪芳脹得不那麼厲害, 也不會凹得那麼利害.
     
    如果本身脹得不勁的雪芳, 就適合用冷的蛋白.

    回覆刪除
  23. 我祇係怕打唔起啲蛋白啫,本來有啲班蘭葉係度,想做班蘭戚風,但聽日又想玩兩樣新嘢 係咪好多心呢
    [版主回覆02/27/2010 22:23:00]蛋白, 係一定打得起的, 最大的敵人, 反而係爆得太勁, 試多幾樣啦! 咪像我, 只係雪芳.

    回覆刪除