2012年3月24日 星期六

2012澳門十兄弟之旅 - day1 路環的美麗餐廳

妹妹和外甥遠渡而來, 大家又在我家中相聚, 真好呀!

一於約埋大伙兒, 到隔離埠玩吓, 可惜我天天上班還要加班, 只能小住一晚........

........一到步, 集齊人馬, 眾兄妹加上小朋友, 一行十人, 浩浩蕩蕩先到路環



里斯本地帶餐廳, 一間由葡國阿伯主理的地道餐廳, 很小巧很用心, 真的很有風味, 香港從來也沒有這種餐廳.

十人衝入去, 竟不用訂位(其實是有點冒險!!:p), 香港也不可能的.

場壁上掛著一個個小型UFO,  問侍者那是什麼, 菲藉侍者說 "just pans", 我才不信, 一定係呢間餐廳的特色.



先來一個燒葡國腸, 未吃已很有趣, 愛c這小豬小火爐!!!


烤得外脆內熱, 切片作頭盆, 嗯, 鹹鹹香香, 爽口不覺油(其實當然油啦, 不過冇有怕了), 是咁多澗葡國餐廳中最好吃的!


見餐牌中有葡式銅盤的菜式, 難道是那個 UFO??? 一定要吃啦!!!!!

它叫做cataplana..........有什麼內涵呢????



呀, 原來是薯仔燴馬介休魚 好入味呢!! 是一大塊的馬介休, 除了陸軍俱樂部之外, 大部份的餐廳只會炒馬介休絲呢.

馬介休是鹹鮮魚, 比較硬, 這樣燴一燴, 剛好濕潤.




再吃幾個小菜, 其中最欣賞的是海鮮湯, 鮮蝦仁, 和海鮮飯........雖然這海鮮飯是貴一點, 但好好吃!



大家邊談邊吃, 在這小巧的房子二樓, 這種情趣在哪裡找???
 


飯後逛一逛, 路環市鎮仍保持寧靜小巧........玩吓漂浮, 去吓美人巷拍吓美人, 十分簡單的開心呀!!!


午餐後先去海邊逛逛, 走到路近盡頭處, 哎, 上次來玩健身器材的地方, 已經變了地磐........又是地產項目吧.....



從前古絀的小學校, 已經拆了,只 剩下外面的遊樂場, 大家都唏噓不已.......




再去安德魯花園餐廳吃葡撻, 嗯, 全澳門只有這間葡撻最好吃, 別去其他的......也只有他, 可以在日本開分店(從前在大阪千日前, 今次再去, 才知搬了去神戶元町)



一杯latte, 已很見心思, 可惜的是, 原本的花園雅座, 已經封閉了, 一堵高牆的外面, 又是一個樓盤的地盤吧!

地產發展, 真的那麼重要嗎? 值得犧牲生活質素.........梗重要啦, $$$$$$$來的嘛, 生活質素算什麼........地產霸權, 就是這樣入侵了.

 
大汽水, 真的勾起我們老人家的回憶, 有一個問題, 究竟有沒有樽裝芬達橙汁賣呢?

大汽水, 已漸漸一枝一枝被拆了.


晚上到內港餐廳吃飯, 這裡幾間餐廳都不錯咖, 妹妹喜歡這間.



又是一個美好的地方, 有心思, 人少少, 美味等著我們............


弟弟訂了葡的燒豬, 和廣式燒豬不同, 皮不是芝麻小孔的, 肉很柔軟, 好好吃呀!



吃了非洲雞, 忌廉焗馬介休, 焗鴨飯, 都好好味.



晚飯完了嗎? 當然未啦, 再去斜對面的肥妹吃夜粥.........肥妹雖靚, 門外仍會抄牌, 小心小心.



很喜歡清清淡淡的蘿蔔糕, 不要臘味, 才吃到甜甜的蘿蔔味, 可惜, 忘了叫"走醬".



再吃白粥.......粥很靚, 不是香港的漿糊粥, 可惜加了味的"粥底", 還是何開記阿婆的白粥最白.






夜了, 沿下環小街走到福隆新街, 啊, 很少人呀, 自由行都留在賭場? 還是連夜泛回內地?




彷彿回到10年前的澳門夜街頭.........



不同的, 只是三可餅店等老店, 換成了SASA, 卓越, 屈臣氏, bossini........



嘻嘻, 看看統計資料, 原來瀏覽人數已突破99,000. 多謝各位友好的探訪和傾計呀!

10 則留言:

  1. 復活節都希望有機會過大海逛逛!
    好鍾意馬介休同埋葡國腸~
    有幸成為你那99,000中的一人!!
    [版主回覆03/26/2012 16:16:00]多謝來訪, 下次去試吓吃這間.

    回覆刪除
  2. 燒葡國腸同薯仔燴馬介休魚,外表(盛器)特別內涵豐富!,現在很少去澳門,駛費太貴!
    [版主回覆03/26/2012 16:17:50]真係很有心思.......妳說得對, 澳門的酒店價格直迫日本呢!

    回覆刪除
  3. 澳門的很多小小店子都各有特式, 不像香港的被大集團壟斷, 裝修, 味道都一式一樣。 恭喜人次長長久久 ~~
    [版主回覆03/26/2012 16:21:53]對呀, 香港的好餐廳, 大都被租金蠶食消失, 剩下的只有大集團, 沒趣......希望澳門不要太快走上這條路.

    回覆刪除
  4. 真慚愧,住係澳門隔離咁耐都無去過澳門d景點同特色餐廳,每次都係跟人去賭場 ...... 食野
    [版主回覆03/27/2012 19:00:36]有機會再去行吓, 澳門令我感受到小時候的社區感覺, 也有精緻的葡國情懷, 賭場呢, 不是我杯茶, 除了一些好的餐廳.

    回覆刪除
  5. 據澳門的朋友講,已開始炒樓多時,樓價飛漲!
    [版主回覆03/27/2012 19:01:49]冇錯, 澳門的朋友早已出了不少書, 記載消逝中的澳門........有得去快d去了.

    回覆刪除
  6. 你又去澳門呀, 我都好like乳豬呀
    [版主回覆03/27/2012 19:03:12]好耐冇去了, 澳門的消費貴左好多, 遊客多左好多, 小城面貌又少左好多..........

    回覆刪除
  7. Pandora 香傭講法文2012年3月27日 下午8:49

    小豬小火爐, so cute^^
    [版主回覆03/28/2012 21:34:33]我相信這是葡國的地道出品......

    回覆刪除
  8. Hi Amoon, 已有99,000 個bloggers 探過您. 恭喜您. 只因您寫得好. 好快便會逹到100,000. 好懷念澳門的美食. 里斯本地帶餐廳真的唔錯, 不過未去過. 有機會會去試吓.
    [版主回覆03/28/2012 21:36:33]謝謝各位時時來探我.....

    里斯本地帶真不錯, 快點去試試, 睇吓有冇機會見到肥伯伯..

    回覆刪除
  9. 又係開心之旅, 雖然得兩日, 不過一定好精彩, 食物好吸引, 我好耐無食過豬腸粉,要加好多好多醬嗰隻...
    [版主回覆03/31/2012 08:49:41]好好feel呀, 行行吃吃, 但真的不夠時間, 想去下環吃切糕都去不了, 還未去邊度有書呢!

    回覆刪除
  10. 個燒腸爐真係好鬼盞
    [版主回覆03/31/2012 09:03:11]真係特別有情趣呀

    回覆刪除