A moon's little world: 1月 2012

2012年1月29日星期日

蘋果黑糖蛋糕

又手痕, 心思思烘焙一下. 我的的烘焙一不要忌廉, 二不能多牛油, 否則會打入冷宮或要我一個人吃晒的.......翻了幾本書, 九成九的烘焙甜品都是牛油忌廉一大堆.......冇法, 只好做我最心愛的......(老實說, 如果食左唔會胖, 又不會高血脂, 我都好喜歡吃牛油忌廉咖........廢話!!)

好耐好耐冇做個全蛋打發, 圓型模子的海綿蛋糕了, 好懷念........用黑糖做, 味道更夾焦糖蘋果喎, 好的......

海綿蛋糕 :15cm圓模(掃油舖好牛油紙)
全蛋3隻, 太古黑砂糖70g, 過篩低粉70g, 熔牛油15g(少少吊吓味都要)

全程坐熱水(呢個係海綿蛋糕成功的最重要因素), 打發全蛋, 加入黑砂, 再打, 打到杰杰滑滑, 挑起滴落可寫個8字, 8字仍浮一會才消失.
分兩三次拌入麵粉, 舀兩三匙麵漿和牛肉攪勻, 倒回mixing bowl和麵漿拌勻, 快快入模, 170度焗約20分鐘, 出爐脫模撕去牛油紙待涼.

焦糖蘋果: 富士蘋果一個(切薄片), 砂糖(白砂, 黑砂或三溫都ok)兩三tbsp, 牛油一小塊, 肉桂粉隨量.

放一小塊牛油起鑊, 再舀一tbsp砂糖炒至全熔, 放入蘋果片炒, 如不夠糖, 再加, 很隨意, 炒至蘋果軟身, 如開始焦, 加入少許水, 再炒, 直至蘋果有少少透明, 熄火, 灑入肉桂粉. 盛起待涼.

蛋糕切平, 把蘋果片舖上, 即成.

放上老友送的日本糖水車厘子, yummy, yummy!!!

2012年1月28日星期六

家中冷, 還是街頭冷

早兩日天氣真冷呀! 由冷冰冰的街上回到家裡, 哇! 怎麼也是冷冰冰的, 一d都唔係溫暖的家(親情就暖的), 冷得好辛苦呀!

忍不住拿了紅外線溫度計, 測一測外邊的溫度, 8.6度

再測一測家中牆壁的溫度........真係豈有此理!!!! 也是8.6度, 怎麼家裡和街上一樣咁冷!!! 難怪每次都抱怨, 回家好似凍到街邊一樣.

以前以為是理所當然咁凍, 那知不是的呀! 是香港樓宇的建築和裝修有問題呀!

剛剛去完日本, 天氣好凍好凍, 晚間氣溫都係得三-四度, 但回到酒店房間, 摸吓d牆壁, 是暖暖的(未開暖氣喎!), 一開暖氣, 間房好快暖晒, 洗澡仲正, d衫褲著上身是乾乾暖暖的. 成個人好鬆弛, 不會冷到縮吓縮吓, 原來在香港捱左好多年凍都唔知.

點解香港樓咁凍??? 原因好簡單...... 近月睇有線的日本電視節目"空間大改造", 人家的裝修又專業, 又雅緻, 又實用, 又窩心不在話下......

他們裝修的第一步, 是為牆壁地板做絕緣!!! 噴一層絕緣物再釘板, 冬暖夏涼..........香港呢, 鋼筋水泥的外牆是熱導體, 批盪又只是一層牆紙或油漆, 所以室外多冷, 室內就多冷. 就算開左暖氣(或夏天冷氣), d熱能好快由牆壁走晒(或走入來), 又嘥電又唔舒服.

香港的裝修業幾時才有進化??? 和太太說笑, 幾時中了六合彩頭獎, 我也要請日本的裝修師傅連物料來香港, 為我家空間大改造.

ーーーーーーーーーーーーーー
暖爐

終於頂不順這個充油式暖爐, 有等於無, 開了幾個鐘, 只滲出少許似有還無的熱力, 有時冷得太辛苦, 索性抱住它, 或者用被披住它當被爐......唉, 陰公, 當初聽說充油式暖爐安全嘛.......真係安全了, 但冇鬼用........平時都係用暖風機, 好得多.

今年終於痛定思痛, 冷定思暖, 買左過TURBO Mica heater(雲母暖爐, 一般會叫陶瓷暖爐), 好好多!!! 開左兩分鐘就暖了, 房間也暖左d, 如果牆壁做左絕緣, 相信效果更好.

搭的士回家時, 司機說 : "買暖爐呀? 不過千祈唔好買充油式喎, 垃圾來咖, 我以前在澳洲讀書, 用暖風機不知幾好, 我阿哥買左個充油式, 頂唔順比左我家姐, 我家姐傻吓傻吓接收左, 結果都係掉左"........唉, 我咪係傻佬loh!!

最冷的日子, 爸媽都堅持不要暖爐, 說什麼穿多幾件衫咪得loh.......唉, 點解要咁樣捱喎!!! 買左個陶瓷暖風機給他們, wow, 真係好暖, 希望他們好好利用啦!

2012年1月27日星期五

沖繩黑糖年糕

連日奔波, 團年, 拜年, 開年......終於可以停下來一日, 就做過年糕吧......說真的, 咁多個大節, 最怕過年了.

家裏沒有材料了, 很難買到理想的雜貨舖超香冇牌黑蔗糖, 也懶去買李祥和糯米粉......

唯有去"霸街"超市買三象牌, 又去citysup買了沖繩黑糖, 開工了.

糯米粉500g, 沖繩黑糖400g 水600g左右

先用一碗水煮溶糖, 加入其餘的水, 待暖, 倒入糯米粉中, 拌勻, 可再加水至粉漿撩起, 會慢慢滴下漿面會回復平坦. 入兩個小牛蛋方模, 大火蒸1.5小時. 出爐後放雪櫃1至2天,等它收水乾爽和不在黏身.

切片蘸蛋煎, 好味呀! 我最愛吃純黑糖年糕, 最愛那醇厚的糖香, 加薑汁也可. 可是一定要靚糖,

千萬不要加椰汁, 白晒晒的什麼燕窩年糕, 或那些橙橙黃黃的色素年糕, 咪攪我......所以, 除了大家姐薑汁黑糖年糕外, 還是要自己蒸了.

今次三象糯米粉做的年糕比較爽硬, 沖繩黑糖也不夠香, 還是阿爸在雜貨舖買的冇牌黑糖最香.

2012年1月24日星期二

關西行2012(9) - 平城京的鹿男(二)

千幾年前, 鹿島大明神武甕槌命( Takemikazuchi no Mikoto)騎著白鹿, 由關東遷移到奈良, 成為春日大社的春日大神, 所以奈良的鹿都是神的座騎.

"春日大社的森林歷史悠久......有一種超越人類智慧的感覺......"

森林的深處, 就是奈良公園飛火野一帶吧.

我們從另一邊的參道, 慢慢走向春日大社.

到了. 春日大社是飛鳥時代重臣藤原氏的守護神社

雖然同是1200年前的建築, 春日大社比起東大寺低調而深邃, 彷彿顯出日本文化部份雖出自中華文化, 但兩者是有根本的區別的.

又是吃飯時間了, 弟弟在網上找到一間吃釜飯(日本煲仔飯)的店子"志津香", 好嘢!

天氣冷冷的, 吃釜飯最好了!!!

到了門口, 只見已有不少人在排隊, 算吧一於照排. 排了半小時有多, 終於可以吃了.

不過呢, 雖然見到他們很用心去煮, 以釜飯來說, 不算太好吃, 飯不夠香, 餸菜也帶不出香氣. 不過仍是吃得很開心, 暖笠笠.

記得有同事說, 去到新的地方, 見人多的餐廳光顧, 一定沒錯.......

.......我都有留意過, 結果不是的, 人多和好吃, 基本上沒有關係, 屢試不爽. 從直覺去碰, 成功機會更高.......

"我經過朱雀門坊, 走入平城宮跡......近鐵電車穿過廣大面積的正中央......"

弟弟高度推介來這重建的古代京城遺跡, 這裡是奇幻小說"鹿男"中, 卑彌呼女王的下屬 - 鹿和鼠, 進行"鎮壓大鯰魚儀式"的舞台.

"近鐵線發出警笛聲, 嘎咚嘎咚通過平城宮遺址......"

我在這裏最開心的, 是見到廣闊無垠的藍天, 好漂亮呀!

然後趁4時半前, 趕到另一個名勝 - 法隆寺.

我問弟弟為什麼要那麼急趕, 他說, 法隆寺是世界上是世界上現存歷史最久的木構建築群......啊! I see I see.

尤其是西院伽藍, 金堂和五重塔, 是1300多年前的建築物, 看著這些超越時空的建築, 真有一種不可思議的感覺.

黃昏, 聽到"咕隆.....咕隆......"的聲響, 不是我的肚子打鼓, 是寺院各門關上的聲音, 是時候離開奈良, 回大阪了.

奈良, 再見了(Nara, soyo nara!)

---------------------------------------------

同場加映funnyface093的"鹿男あをによし"場景巡視(後篇) - 你會知什麼是拍得美麗了.