2009年9月6日 星期日

日本蕃薯Tabatière

又可以做包包了, 今次做乜好呢, 也是慢發酵包, 找點新做形.......有一種叫tabatiere(鼻煙盒)的都幾有趣........



包底好齋的, 剛買了日本蕃薯, 好! 煙盒放蕃薯吧!


高粉200g 全麥粉50g 速酵母0.25tsp(約1g) 鹽4g 糖5g 水155g


搓至起筋光滑, 室溫發酵1小時, 排氣滾圓放雪櫃1晚



第二天上午, 蕃薯切開蒸軟, 150度焗5分鐘令它乾身.


麵團分割4份, 滾圓靜置20分鐘讓它回復室溫, 蘸滿手粉, 將半個麵團用麵棍碌扁, 塞入蕃薯, 將碌扁的部份覆上蓋著. 發酵40-50分鐘


入爐230度焗15-20分至包面焦黃.



真係好歐洲包的硬皮呢!



賽後檢討 : 包包真係好香, 不過焗得透的後遺症是包肉較乾.


因為時間關係, 發酵未夠, 可以再發多10分鐘呢!


麵團做成長圓形才碌扁, 包形狀會更圓吧! 下次再試



22 則留言:

  1. 這個包包的做型真有趣!其實要個包硬皮,是要焗耐D還是要入爐噴水呢?
    [版主回覆09/07/2009 07:37:00]我都係在一本書上學返來呢. 硬包係高溫焗成的, 不過連d包肉都會硬d.

    回覆刪除
  2. 很香,好食~~
    [版主回覆09/07/2009 07:38:00]真係幾香, 不過硬左dd, 下次發酵發耐dd.

    回覆刪除
  3. 包肉乾身又唔係好覺wor~ 睇落. 個色水仲好靚tim~~
    我覺得個做型似荷包仔呀~~ 得意  
    你搓個麵糰好靚wor, 真係好光滑!! 高手即係高手~
     
    [版主回覆09/07/2009 11:50:00]又唔算硬, 似是歐包嗰隻啦, 要送湯或飲品啦.
     
    謝謝呀, 麵團我都好熟手的了, 一般都搓得ok o架.

    回覆刪除
  4. 我都係覺得似荷包仔多d渦~ 用來裝硬幣果种呀~~ 好特別的造形尼~~
     
    [版主回覆09/07/2009 11:51:00]下次放d硬幣入去先, haha.......我想緊放d餡入去.

    回覆刪除
  5. 個造型好得意!
    [版主回覆09/07/2009 11:52:00]我都係在本麵包書度見到, 覺得易做又得意.

    回覆刪除
  6. 咁係唔係用低少少的溫度來焗,包包會無咁硬,而一樣可以做這包包呢?請指教,因我很想學這低溫法,可以隔晚做定,第二晚才焗,不用同一晚做這麼趕急呢。
    [版主回覆09/07/2009 11:55:00]係呀, 我今次用230至250度焗, 包會厚皮和上晒色, 香d, 但包肉也乾d, 一般軟麵包用180度焗, 顏色淺d, 肉軟d, 冇咁香......
     
    我的係細爐, 如果要皮厚肉軟, 可能就要大爐, 高溫, 短時間焗好........我都未試過呢!

    回覆刪除
  7. 個造型超得.
    [版主回覆09/07/2009 11:56:00]簡單又易做, 不過要蘸滿手粉, 否則會黏埋.

    回覆刪除
  8. 你整嘅包包越來越吸引呀!
     
    如果中段將爐溫降低少少, 包肉會唔會無咁乾呢?
    [版主回覆09/07/2009 20:02:00]玩吓變化嘛, 我都想試吓其他味道和做形........
     
    嗯.......可以一試, 不過我地呢d爐仔, 都好難理想, 一定要大爐, d熱力四面迫入去, 至可以短時間內令麵包皮脆肉軟呢!

    回覆刪除
  9. 哎呀, 包包嘅造型好可愛呢 !
    [版主回覆09/07/2009 20:02:00]呢個係好傳統的法國麵包做型呢!

    回覆刪除
  10. 好香好味呀 ! 不過得四個唔夠分 !
    [版主回覆09/07/2009 20:03:00]四個, 小小地試吓, 少食多滋味!!!

    回覆刪除
  11. hi 好正牙,,,番薯包
    [版主回覆09/08/2009 07:51:00]幾香呀!

    回覆刪除
  12. 包包走餡可以嗎???
    [版主回覆09/08/2009 07:52:00]當然可以啦, 挖左舊蕃薯煲糖水咪得lor, 哈哈

    回覆刪除
  13. 脹卜卜真係似銀包仔呀. 好靚好得意. 番薯是否連皮的?
    [版主回覆09/08/2009 17:22:00]咁應該叫"荷包"包了, haha . 
     
    D皮脆脆地, ok呀.

    回覆刪除
  14. Not Bad.......... 合格播睇個款!去完歐洲係唔同 d …
    [版主回覆09/08/2009 13:32:00]都ok的, 不過我喜歡軟d, 易入口.

    回覆刪除
  15. 但我覺得依個造型已經好正喇~~~  大熱天時,真係唔願去整麵包呀~~
    [版主回覆09/08/2009 13:33:00]幾得意架, 又簡單. 我都要開大冷氣至得呢!

    回覆刪除
  16. 好得意
    [版主回覆09/08/2009 15:40:00]謝謝呀!

    回覆刪除
  17. 想問吓,入爐後洗唔洗噴水架???
    [版主回覆09/09/2009 07:59:00]我都有噴兩三次, 但不能太多, 因為我的爐仔不夠火力的呢.

    回覆刪除
  18. 早呀﹗
    昨晚做你這包包,因家裡沒有麥粉,於是只用高根粉罷了。在量材料時才發覺.....你沒有例出水的份量喎。唯有用其他類似250g粉的水份來做,大概用了143g水,幸好粉糰不濕不乾很好搓。
    現在,在雪柜,今晚回家才焗,希望有軟熟包包食啦。
    想問我的水份對不對呢?
    [版主回覆09/09/2009 13:44:00]哎呀, 我真大懵了........因太熟了.
     
    143g都ok呀, 變化很大的, 其實麵團不用太濕呢! 濕了麵包反而會韌的.
     
    要軟熟, 記得發酵要充分(麵團雪櫃拿出來, 可能會冷d, 要發耐d), 另外不要太高溫, 焗得太深色, 微微上色, 就會軟了.

    回覆刪除
  19. 望著師父整的麵包.... 已經很想食!!
    這包難不難的?? 我是初學者哦!
    是否整包不用奶粉或奶, 只用水代替也行?
    如須用奶粉... 買那一牌子?
    [版主回覆09/09/2009 22:15:00]這類慢酵包是頗易做的, 不過就不是鬆軟類, 而是硬包類, 軟包都要加牛油, 加蛋加糖就更軟了.
     
    我個人不太喜歡加奶粉的, 因為用了幾種奶粉都有蘇味,  我會索性加咖啡伴侶. 加奶對麵包的質感沒有改變, 如果想有牛奶風味, 都可以加的.

    回覆刪除
  20. 多謝你呀﹗怪不得我在末發酵超過60分鐘,才免強發大可入爐。
    [版主回覆09/10/2009 13:34:00]別客氣, 等我過來睇一睇先

    回覆刪除
  21. 好主意, 咁請問煲糖水有得食未呢?????
    [版主回覆09/11/2009 14:03:00]未得閒煲呀, 希望不要發芽啦, 放假先啦!

    回覆刪除
  22.         好靚 啫!你真係搵手搓麵糰 o架?真係搓得好靚喎!(羨慕-ing)         咁你入爐時有冇噴水?
    [版主回覆09/14/2009 08:37:00]係呀, 手搓的, 如果機搓, 我估會再滑d.
     
    入爐係咁意噴兩三次啦.

    回覆刪除