2008年11月9日 星期日

Pie of the Fall

終於, 秋天到了, 西風吹起, 枯葉片片落下 ---叫秋天做"Fall" 美國人難得的品味.


在紅葉林中拾起枯葉十數片, 樹上摘下三數剛熟的蘋果, 麥田中成熟的麥子磨粉, 砌出一個蘋果批.


我愛麥田的顏色, 因為蘋果批的金黃.......



吃過最好吃的青森蘋果園的蘋果批........蘋果餡一定要一塊塊完整的, 煮到柔軟中帶點彈性, 千萬不可爛蓉蓉的, 怎做? 很簡單, 就是用生生的硬蘋果, 最好當然用日本的"陸奧mutsu"或者"紅玉kougyoku", 可是那裡找? 我用的是三個媽媽家拿的祖國"富士", 都ok啦! 怎煮也不爛. 如果蘋果太熟, 一煮便會爛得像爛糊, 那趕快倒掉吧(我衰過.......:p)


18cm 蘋果批食譜(我的試驗)

焦糖蘋果餡 :  紅蘋果 3大個 , 砂糖100g牛油30g(份量很隨意的我自己試味加減) 肉桂粉(隨意灑滿便行了) , 橙酒(隨意灑些)

蘋過削皮去芯, 切成大大塊. 將砂糖倒在鋼煲中, 加少少水調勻, 中火煮至淺啡色, 然後加入牛油煮熔(次序掉轉的話, 糖怎煮也不焦的), 加入蘋果拌煮, 煮很久的, 直至蘋果半透明稍軟身和有彈性. 加肉桂粉和橙酒, 撈起放在一個和批盤差不多大小的碟子中壓實, 放雪櫃冷藏一會, 倒掉水份.

下次, 我會加入一些魚膠粉或果膠, 蘋果餡會黏合得漂亮些.



批皮 ( 這批皮很好呀, 又脆, 怎焗也不會熔) : 低筋粉250g 淡牛油100g(雪硬切小粒) 鹽少許, 冰水3-4大匙.


把凍牛油粒放在麵粉中, 座冰水捏碎牛油和麵粉和鹽混好成粗粉狀, 加入水, 令麵粉成乾團, 分割成兩團, 一團200g(批底), 另一團約150g包(批面), 保鮮膜放雪櫃一小時以上. 取出大的一團, 用切割重疊手法令麵團多點層次, 再墊保鮮膜, 用擀麵棒將麵團"轆"成圓片, 稍比批盤大點.


批盤噴些脫模油, 將批皮舖在它上面壓好, 用刀和叉子整理批邊, 和刺一些小孔在批底. 放雪櫃中雪冷.


批面的麵團用同一方法"轆"好.



小心將盛在碟子中的焦糖蘋果倒置在批底上, 將批面蓋上, 再以刀和叉子整理批邊..........或像我玩玩, 用小刀切出各種樹葉狀, 舖在蘋果上面 (意念來自"基本の西洋甜品").

掃蛋液, 入爐180度焗約30分鐘, 或直至批皮上色.



稍待涼, 吃得了!! 皮脆 , 果肉軟而有彈性, 很香! 皮太薄了, 下次可做厚些!!



這是我真真正正自己做的第一個蘋果批.......上次那趟幫手做, 失敗透了......都很久了.......


30 則留言:

  1. 好奇怪, 我食蘋果批一定要加雪糕. 也最喜歡面層的酥皮.
    [版主回覆11/09/2008 18:54:00]妳的是正宗美式吃法呀
     
    我也覺得今次d皮太薄, 下次做厚d先.......我第一次做蘋果批呀, 玩下嘢啦, 愛靚唔愛皮 .

    回覆刪除
  2. 蘋果批.. 我鍾意呀!
    [版主回覆11/09/2008 18:58:00]妳又玩丫, 試番件先.

    回覆刪除
  3. Moon兄!包餅師傅曾說過,我們可以用中國的富士蘋果來整pie餡,因為它煮過後,無咁容易爛喎!
    [版主回覆11/09/2008 19:22:00]係呀, 唔怕話妳知, 我本來重金在citysuper買了三個日本Johnagold蘋果, 拿上手又紅又脆的, 點知切開後很粉, 一煮便像爛蕃薯的, 全倒掉 .........一看食用日期, 買了舊貨呀~~~
     
    唉, 下次都係買富士算了, 記得買生d

    回覆刪除
  4. wow!!!!! so pretty!!!! 
    [版主回覆11/09/2008 19:23:00]hehe, 玩玩啫, 好好玩呀! 比食仲有趣!

    回覆刪除
  5. 蘋果批己經吸引,個批面的decoration重靚。 佩服佩服。
    [版主回覆11/10/2008 13:41:00]謝謝呀, 我都係跟書玩吓, 好玩呀!

    回覆刪除
  6. 秋風起........
    [版主回覆11/10/2008 13:42:00]三蛇肥!
    食臘味!
     

    回覆刪除
  7.  wow ))))  靚到丫~
     靚成咁樣會唔捨得架喎
    [版主回覆11/10/2008 13:43:00]唔緊要, 影低它最美的一刻, 才吃.
     

    回覆刪除
  8. 靚成咁樣會唔捨得食架喎

    回覆刪除
  9. 好詩情畫意的批,我喜歡爽脆大萍果,但不愛烹煮過的萍果。下次才幫襯啦。
    [版主回覆11/10/2008 13:45:00]hehe, 是"扮"詩情畫意........人在空閒時才有詩情畫意呢...........
     
    煮軟的蘋果, 加上牛油焦糖, 有一種獨特的香味, 不同的呢!

    回覆刪除
  10. 好PRO喎﹐靚到可以拎出去賣﹗我開頭仲以為係您喺日本嘢食D相添
    [版主回覆11/10/2008 13:46:00]我呢個係玩耍之作, 未夠料拿出去賣呢! 下次我重料d先.

    回覆刪除
  11. very lovely decoration!!! It's so pretty....
    [版主回覆11/10/2008 13:49:00]Thank you ar! I love Fall and so do apple pie. Would you try to make one?

    回覆刪除
  12. 嘩, A_Moon 焗批喎!!! 好特別!!! 你個批好鬼靚播,連個面都整得咁有心機, 比我就撻塊皮向面就算 焗蘋果好多時都用 granny smith. 我好鍾意食apple pie 或 焗蘋果, 只是個批皮吾易做呀!! 咁你下次嘅 surprise 係乜呢???
    [版主回覆11/10/2008 13:58:00]我都係跟一本日本糕點書做啫. 好玩呀, 下次我試下撻一塊批皮, 再加樹葉, 就更兩全其美了.
     
    granny smith, 唉, 香港的蘋果種類少得可憐, 只是富士或美國地厘蛇果, 加少少"加拿"........地厘唔知得唔得, 它很香和硬, 但太甜. 大家試過嗎?, 我不想煮完爛patpat的.
     
    批皮我只是一層過呀, 雖是用層層疊法, 呀, 下次我在層與層之間濕點水, 或植物油, 可否做到一層層? 我可不想用包牛油, 或水皮油皮咁酥呀........大家有乜方法?

    回覆刪除
  13. 你造個批面太有心思,讚 ! 有人會放些飽糠加入炒過的蘋果去索汁,最近推廣的燕麥糠唔知得唔得 ?仲可以加些霖酒提子入蘋果餡!最後,以雲尼拿雪糕伴住熱批食,就Perfect啦!
    [版主回覆11/10/2008 14:02:00]嗯.......明白, 不過我想餡料乾身爽d, 不想糊糊的, 不過我想餡料粘結合得好d, 我吃個日本的是果塊和果塊間有些透明的膠狀, 不知是果膠還是魚膠粉, 還是大菜?
    Rum酒提子, 好提議, 加雪糕食, 好提議, 不過怕肥.........

    回覆刪除
  14. 好靓的蘋果批 !
    [版主回覆11/10/2008 14:05:00]妳也試吓, 好易整, 不過要慢工出細貨, 最難是我的煲子很小, 要分三次煮蘋果.........和批皮要雪凍, 我分兩晚做, 第一晚, 煮蘋果, 搓麵團, 第二朝, 做型, 焗, 反而很快.

    回覆刪除
  15. 哇……哇……哇……好吸引呢﹗我也只做過一次失敗的apple pie啊﹗
    [版主回覆11/10/2008 14:05:00]等妳有機會, 一起玩返個啦.

    回覆刪除
  16. Fatgarfield 肥加菲2008年11月10日 下午1:21

    Wow, this apple pie is so pretty! I love the leaf-design on the top. And your border is so pretty too. Yummy!
    [版主回覆11/10/2008 14:06:00]其實裝飾不太難的, 好好玩, 我這方面是有少少天份, 和多多的貪玩.

    回覆刪除
  17. 好靚喎,尤其是d樹葉!十分應節~ 哈!你整餅都咁有詩意!
    [版主回覆11/10/2008 22:11:00]hehe, 係"懶"詩意.........不過秋天又幾詩意的, 加少少氣氛, 做起來份外好玩的.

    回覆刪除
  18. 做得好靚啊~
    [版主回覆11/10/2008 22:12:00]你又整比仔仔食, 可叫他吸一些動物公仔做批面呀!

    回覆刪除
  19. 整得好靚,好有秋天氣息,見到都想食
    [版主回覆11/10/2008 22:15:00]妳又整番個丫, 好好玩好易做的.

    回覆刪除
  20. 真係好靚呀......可以成為MOON哥既另一招牌作品呀
    [版主回覆11/10/2008 22:17:00]我都係抄抄吓的呀, 不過真的很好玩呀!, 妳又試吓啦!

    回覆刪除
  21. 楓葉... 加拿大...
    [版主回覆11/11/2008 09:12:00]如果我秋天去了加拿大渡假, 在秋天的陽光下(忘了它的下雨天), 大大的廚房和焗爐, 做一個蘋果批, 等妹妹一家吃下午茶, 多好呀........唉, 好想去呀.......

    回覆刪除
  22. 唉呀, 俾你引完一次又一次, 我睇來要戒你既blog呢.... apple pie都係我既target之一, 不過我想整多層d個隻. 唔肥又點會好食呢???? 最多食完跑多幾個圈啦!
    [版主回覆11/11/2008 09:14:00]一於做一個玩吓啦.
     
    多層那種, 我都想做呀, 不過我未試過呀, 又不想做丹麥酥皮, 水皮油皮又太麻煩, 我懶呀:p

    回覆刪除
  23. 滿地紅葉...... .....秋意正濃!!
    [版主回覆11/11/2008 22:23:00]世事一場大夢, 人生幾度秋涼, 夜來楓葉已鳴廊, 細看眉頭鬢上.........

    回覆刪除
  24. 據說, golden delicious, jonagold, fuji 也可以. 你這個不是左叠右叠的包大舊牛油(這個我都怕怕)的肥肥派皮嗎??? 冇"肥油" 做吾到flaky的效果播????
    [版主回覆11/11/2008 22:29:00]唉, 三種之中, 香港街市只找到fuji, jonagold!!! 我買了呀, 在citysuper $21一個的日本jonagold, 很靚很硬淨呀表面上, 我忍痛買了, 那知一切開.........粉的, 一煮, 爛到一patpat, 好氣呀!  倒掉了.
     
    我的只是一般牛油批皮, 一本書上說, 切切疊疊可增加層次, 我都覺得冇可能了, 果然沒有..........下次我會每層之間掃一掃水或植物油, 不知會不會一層層呢? 我不想用shortening或包牛油, 我不是想做酥皮, 我覺得這個牛油皮也是很好吃的.
     

    回覆刪除
  25. 嘩,靚得好過份呀~~~~~
    [版主回覆11/11/2008 22:29:00]hehe, 靚, 那有過份呢........

    回覆刪除
  26. 好漂亮哦!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
    [版主回覆11/11/2008 22:31:00]唉呀, 面紅呀, 個批 ............我想緊怎令它更好吃, 批皮太少了, 不過癮, 看看下次怎增加批皮先

    回覆刪除
  27. but 做型好靚呀!
    [版主回覆11/12/2008 07:40:00]謝謝呀! 下次我想舖多一層批面, 可吃多點批皮, 又冇咁散. 呀不知在疊麵團的過程中, 掃一層水可做成少少一層層的效果嗎? 我不想用shortening或包牛油呢. 我又想試吓.

    回覆刪除
  28. 喂喂, 餡要杰用麵粉或粟粉埋獻, 咁就唔會瀉, 另外, 青蘋果是granny smith 是也, 亦可用golden apple, 金蘋果.
    [版主回覆11/12/2008 07:36:00]下次試吓青蘋果先, 只是覺得紅蘋果較香, 可惜香港沒有Johnathan(即是日本叫的"紅玉"), 聽說它又香又酸又夠硬.... golden apple我這邊街市都很少見.......下次也會試試落東西粘實d蘋果, 不過下麵粉和粟粉總覺有點糊, 上次在青森吃的, 是透明的東西, 不知是果膠還是魚膠, 感覺很爽, 我又想試吓.

    回覆刪除
  29. 好靚呀, 我聞到蘋果香味.......................
    [版主回覆11/12/2008 22:39:00]蘋果加焦糖肉桂, 真係天作之合, 好香甜.

    回覆刪除
  30. 你個blog真係好正~~我最近迷上了做菜做蛋糕~以後也會常來的~希望你多多指教哦~!
    想問問, 做apple pie係唔係一定要落肉桂粉?唔落得唔得?
    [版主回覆02/27/2009 14:52:00]謝謝 , 做菜做糕, 都是人生樂趣, 多來分享啦.
     
    肉桂粉不是必須的, 只是它和蘋果味好夾, 如不喜歡也可不下的.

    回覆刪除